KSI Berritzaile, kultura eta sorkuntza industrien sektoreko enpresentzako berrikuntza-programak, Tecnalia, Vicomtech, Euskalit, Elkargi eta Innobasque-Berrikuntzaren Euskal Agentziarekin lankidetzan Eusko Jaurlaritzak bultzatuak, hirugarren deialdia ireki du proiektuak aurkezteko.
Programaren helburua aukera-guneak sortu eta garatzea da hiru arlotan. Tecnaliak eta Vicomtech-ek laguntza emango diete enpresei beren ideia berritzaileak martxan jartzeko proiektu berrietan berrikuntza eta transferentzia teknologikoan. Gainera, sarrera libreko jardunaldietan erakutsiko dituzte garatzen dituzten teknologiak. Antolaketa-ereduaren berrikuntzan Euskalit izango da aholkularia, eta Elkargi lan honetan arduratuko da enpresen finantza-gaikuntzaren ardatzean.
KSI Berritzaile kultura- eta sorkuntza-industrien sektorera zuzenduta dago, eta hau 15 azpisektorek osatzen dute; horien artean daude arkitektura, diseinua, moda, ikus-entzunezkoak eta eduki digitalak, zinema, bideojokoak, musika, arte eszenikoak, ikus arteak, publizitatea eta marketina, kultura-ondarea, eskulangintza, argitalpena eta hizkuntzaren industriak.
Ekimen honen nodo bideratzaileak Eiken, Eide, Habic, Ehmbe, Langune, Basquemoda, Karraskan, Eskena, Arbaso, Liburuaren Ganbera, Gaia-Basquegame, Euskal Herriko Arkitektoen Elkargo Ofiziala eta Bizkaiko Publizitate Agentzien Elkartea dira; beraz, beren bazkideen artean ezagutarazi eta sustatuko dute ekimena.
Erabilgarri dauden azken datuen arabera, sorkuntza- eta kultura-industrien sektoreak 14.459 enpresa biltzen ditu Euskadin, horietako gehienak tamaina txikikoak, eta 70.000 pertsona enplegatzen ditu, euskal enpleguaren % 8. Industria hauek RIS3 Euskadi espezializazio adimendunaren euskal estrategiaren aukera-lurraldeetako bat dira, Euskadi 2020 Zientzia, Teknologia eta Berrikuntza Planean jasoa, balio erantsi handiko arloetan sakontzen duena, azkenean hazkundea eta enplegua eragiteko produktu eta zerbitzu berriak sor ditzaten.
