16 euskal ikastetxetako 472 ikaslek parte hartu dute 16. FIRST LEGO League Euskadiren prestakuntza-programan. Programa horrek sei bisita izan ditu aurtengo erronkarekin lotutako erakundeetan: ozeanoen esplorazioa.
Ikasleek bertatik bertara ezagutu dute Donostiako Aquariumeko ikertzaile, zientzialari eta teknologoen lana, AZTI – Itsas eta Elikagaien Ikerketa Zentroa, BCAM- Basque Center for Applied Mathematics, CIMASUB – Donostiako Urpeko Zinemaren Nazioarteko Zikloa, Sener, UPV/EHU eta Vicinay Marine.
Berrikuntzaren Euskal Agentziak Innobasque antolatutako eta Estatuan bakarra den prestakuntza-programa honen bisitei esker, Euskadiko Bigarren Hezkuntzako eta Batxilergoko ikasleek ozeanografian egindako aurrerapenak, egitura flotatzaileen ingeniaritza, ozeanoaren eta espazioaren arteko harremana eta euskal kostaldean izandako hondartzen arrazoiak ezagutu ahal izan dituzte, besteak beste.
Lortutako ezagutzak inspirazio gisa balio du FIRST LEGO League Euskadin parte hartzen duten taldeek hurrengo asteetan otsailaren 22an Bilbon, Donostian, Arrasaten eta Gasteizen aldi berean egingo den txapelketan aurkeztuko dituzten berrikuntza-proiektuak garatzeko.
FLL Euskadiri buruz
FIRST LEGO League Euskadi 6 eta 16 urte bitarteko euskal ikasleen artean zientziarekiko eta teknologiarekiko interesa pizten duen nazioarteko hezkuntza-programa da, eta urtero 110 herrialdetako 679.000 gazte baino gehiago inspiratzen ditu. Euskadin, Berrikuntzaren Euskal Agentziak Innobasque, Deustuko Unibertsitateak, Mondragon Unibertsitateak eta Euskal Herriko Unibertsitateak antolatu dute ekimena.
Gainera, Eusko Jaurlaritzako Hezkuntza Sailak eta Zientzia, Unibertsitate eta Berrikuntza Sailak laguntzen dute, baita Bizkaiko, Arabako eta Gipuzkoako foru-aldundiek ere. Erakunde horiek guztiek konpromisoa dute ikasleek karrera zientifiko-teknologikoekiko eta horiekin lotutako trebetasunekiko interesa pizteko: berrikuntza, esperimentazioa, pentsamendu kritikoa, talde-lana edo sormena.
