Emakumea lan-merkatuan sartzea finkaturiko egitatea da aspalditxotik. Hala ere, enpresa-munduko “joko-arauak” ez dira asko aldatu ordudanik, nahiz eta jendearen bizimodua asko aldatu den. Horregatik, Bizkaiko Foru Aldundiak eta Bilboko Udalak sustaturiko Denbbora Saretik hiri-eredu berria bultzatzen da, ekonomia, gizarte eta ingurumenaren iraunkortasunean oinarriturik jendearen bizi-kalitatea hobetzeko, denboraren erabilera berrien sustapenaren bidez.
Eremu honetan aurrera egitearen onurak honako hauek dira: langileen autonomia handiagoa, hierarkiaren horizontaltasuna, lan-ordutegietan malgutasun handiagoa, balio-aniztasun eta postuetan txandakatzeko aukera handiagoa, kalitatezko kudeaketa eta etengabeko hobekuntza, ezagutzaren kudeaketa, helburuen arabera talde-lanaren eta lantaldeen kudeaketaren hobekuntza, IKTak sartzea, emaitzei loturiko ordainsariak, edo Gizarte Erantzukizun Korporatiboan parte-hartzea.
Denbbora Sareak 9 arrazoi identifikatu ditu denboraren erabileretan berrikuntza egitea beharrezkoa eta errentagarria dela erakusteko:
- Enpresa-kulturan eta ohiko kudeatze-ereduan aldaketa behar delako, pertsonengan ardaztua, malguagoa eta talentua atxikitzea ahalbidetuko duena.
- Familia-ingurunearen arduradun bakarrak emakumeak izatea sustatu duen gizarte- eta familia-ereduarekin hausteko.
- Enpleguaren eta familia-zaintzaren dikotomiagatik eta horren ondorioengatik emakumeen bizitzan sortzen diren etengabeko gatazken ondorioak saihesteko.
- Lana, familia eta bizitza pertsonala bateragarri egitea Gizarte Erantzukizun Korporatiboaren parte delako.
- Langileek erakundeko “kapitalaren” parte direla senti dezaten.
- Langileen artean gogobetetasuna sustatzeko.
- Emakumeen presentzia handiagoa sustatzeko, gaur egun zailagoa baitute lan-merkatuan sartzea eta irautea.
- Gaur egungo araudiak ere kalitate-arloan gai honetara jotzen baitute.
- Erakundeak indarrean dagoen legeria bete dezan, onuragarria izan daitekeelarik beste erakunde, administrazio eta bezero batzuekiko harremanetarako.
Denbbora, eta horren parte da Innobasque beste 28 erakunderekin batera, lankidetza publiko-pribaturako gunea da, harreman sozio-laboralen kultura berria diseinatu eta bultzatzea ahalbidetuko duena lan eta familia bateragarri egiteari, erantzunkidetasunari eta genero-zuzentasunari dagokionez.
