Berrikuntzaren Kulturaren I. Azterketak datu kuantitatiboak eskaintzen ditu, eta horiek enpresei berrikuntzaren kultura bultzatzea ahalbidetzen diete lehiakortasunaren funtsezko elementu gisa, eta pertsonak sortzaileak direla azaltzen du, baina zailtasunak dituztela beren ideiak inplementatzeko orduan.
- Txostena egiten parte hartu zuten enpresek berrikuntzaren kulturak beraien erakundeetan duen egoeraren diagnosi osoa lortu zuten.
- Azterketa hau euskal enpresetara hedatzeko eta 2016ko edizioa egiterakoan horien kopurua gehitzeko helburuarekin, Kalitatearen Espainiako Elkarteak (AEC), Euskalit-ek eta Innobasquek lankidetza-hitzarmena egin dute.
Bilbo, 2015eko urriaren 29a. Enpresetan lan egiten duten pertsonak sortzaileak dira eta proiektu berritzaileak asmatzeko gai; hala ere, zailtasunak aurkitzen dituzte horiek gauzatzeko orduan. Hori da Berrikuntzaren Kulturaren Indizearen (2015) lehen ediziotik ateratzen den ondorioetako bat; azterlana Kalitatearen Espainiako Elkarteak (AEC) egin du, eta Euskadin Euskalit-ek eta Innobasque-Berrikuntzaren Euskal Agentziak bultzatu dute. Azterketak berrikuntzaren kulturak enpresetan duen egoerari buruzko datu kuantitatiboak ematen ditu, eta berrikuntzaren kulturaren garapena eragiteko informazioa eskaintzen die, funtsezko elementu gisa beraien lehiakortasunean.
Honela jarri da agerian Kudeaketa Aurreratuaren Europako Astearen esparruan egin den “Berrikuntzaren Kultura erakundeetan” jardunaldian. Parte-hartzaileak hauek izan dira: Marta Villanueva, AECeko zuzendari nagusia; Fran Chuan, Dícereko bazkide sortzailea; Alberto Conde, NEM Solutionseko zuzendari nagusia; Aitor Arzuaga, ZIVeko Global Product managerra; Fernando Sierra, Euskaliteko zuzendaria; eta Txema Villate, Innobasqueko zuzendari nagusia. Condek eta Arzuagak baieztatu dute ekinbide honetan parte hartzeak lehiakortasuna bultzatzen lagundu diela, berrikuntzaren kultura indartzen duten gakoak identifikatu baitituzte beraien negozio-helburuekin bat egiteko. Azterketan parte hartzen duten enpresek beren berrikuntza-kulturaren egoerari buruzko txosten osoa lortzen dute, hori aktibatzeko aukerak eta hobekuntzak identifikatzea ahalbidetuz.
Horregatik, Kalitatearen Espainiako Elkarteak (AEC), Euskalit-ek eta Innobasquek gaur arratsaldean lankidetza-hitzarmena egin dute, azterketa hau euskal enpresetara zabaltzeko helburuarekin; izan ere, azterketaren parte bihurtu eta aberasten badute, aldi berean berrikuntzak beraien erakundeetan duen egoeraren diagnosia jasoko dute onura gisa.
Azterketa Babson College-Boston-eko Jay Rao eta Joe Weintraub-ek sorturiko metodologiaren arabera egiten da, hori baita erakundeen giro berritzailea diagnostikatzen duena Berrikuntzaren Kultura osatzen duten funtsezko sei blokeetatik abiatuta: baliabideak, prozesuak, emaitzak, balioak, jokabideak eta giroa.
Txosten honen lehenengo edizioa egin eta gero, AECek esan du berrikuntzaren kultura sortzeko hiru elementu uztartu beharra dagoela: estrategia, lidergoa eta pertsonak. Lidergorik eza eta baliabide-urritasuna, baita denbora eta espaziorik eza edo adituengana jotzeko ezintasuna: horiek dira oztopo nagusiak ulertzeko zergatik berrikuntza ez den gauzatzen diziplina bereizi gisa enpresetan, nahiz eta horiek badituzten pertsona sortzaileak.
