Confebask-ek egin berri duen txostenaren arabera, euskal ekonomia %1,9 haziko da 2015ean, eta hazkundea “neurrizkotzat” jotzen du. “Intentsitate apaleko” suspertze honek, sendotzeko, 7 erronka gainditzea eskatzen du:
- Ekonomian eskaria eta jarduera suspertzea, eta enpresa- eta gizarte-ehuna sendotzea.
- Finantzaketa arlo pribatura iritsiko dela ziurtatzea, prezio eta kopuru aldetik baldintza egokietan.
- Jokabideen eta gauzak egiteko moduen berritze etikoa, erakundeekiko eta gizarte-eragileekiko konfiantza berreskuratzeko xedeaz.
- Enpresaburuaren eta enpresaren eginkizuna aitortu eta balioan jartzea, hazkundea, enplegua eta gizarte-garapena sortzen baitute.
- Enpresen lehiakortasuna ziurtatzeko eta enplegua sortzen laguntzeko (energia, finantza, zerga…) erreformen aplikazioan sakontzea.
- Enpresa osatzen dutenen artean lankidetza ziurtatuko duen giroa sortzea, enpresaren lehiakortasuna eta bideragarritasuna sendotzeko, eta enplegu, kalitate eta egonkortasunaren gainean ekonomia suspertzeak duen eragina handiagotzeko.
- Gure ekonomiaren eta ekoizpen-sarearen (enpresa-dimentsio, fabrikazio aurreratu, lanbide-heziketa, nazioartekotze eta berrikuntzaren) etorkizuna finkatzeko funtsezkoak diren politiken garapena bultzatzen jarraitzea.
Confebasken iritziz, “euskal ekonomia irten da atzeralditik eta enpresak eta enplegua sortzen hasita dago, baina oraindik erritmo motelean; 2015ean bizkortuz joatea espero da, hazkunde sozio-ekonomiko handiagoko eszenatokia lortu beharko litzatekeelarik”. BPGn %1,9ko hazkundea aurreikusten du Elkarteak, 17.000 enplegu berri sortzea, eta langabezia-tasa %13,5era jaistea.
Nazioarteko testuingurua
Txostenak munduko gainerako ekonomien datu makroekonomikoak ere ematen ditu:
- Munduko ekonomia %3,8 haziko da
- Europa eta Japonia hazkunde apalenekoak izango dira, nahiz eta eurogunea hobetuko den apur bat, %1,1eko hazkundea ikusten baita aurrez
- AEBek %3,1eraino igoko dute hazkundea
- Munduko merkataritzan hobekuntza aurreikusten da, %4,7ra gehituko baita
- Europako Batasunean interes-tasek gutxieneko historikoetan jarraituko dute
- Espainiako ekonomia %2 haziko da 2015ean, 2014an baino 7 hamarren gehiago, eta eurogunean baino ia puntu bat gehiago.
- Espainiako langabezia-tasa 1,5 puntu jaitsiko da, %23raino urteko batez bestekoan
